దేశంలో విపరీతంగా ధరలు పెరిగిన విషయం చిన్న పిల్లలు కూడా అర్థం చేసుకుంటున్నారు. అర్థం చేసుకోవడమే కాదు, ఇలా విపరీతంగా ధరలు పెంచేస్తే ఎలా చదువుకొవాలని ప్రశ్నిస్తూ ప్రధానికి ఘాటు లేఖ కూడా రాసింది ఓ ఆరేళ్ళ బాలిక. వివరాల్లోకి వెళితే… ఉత్తరప్రదేశ్ లోని కన్నౌజ్ జిల్లా చిబ్రమావుకు చెందిన ఆరేళ్ల కీర్తి దూబే 1 వ తరగతి చదువుతోంది. ఆమె పెన్సిల్, రబ్బర్‌ను క్లాస్‌లో పోగొట్టుకోగా… కొత్త పెన్సిల్ కొనమని తల్లిని అడిగితే ఆమె కీర్తిని పెన్సిల్, రబ్బర్ ధరలు పెరిగిపోయాయి… ప్రతీసారి కొనలేనని ఈ మధ్య తరుచుగా మందలిస్తోంది. అలాగే గత ఆదివారం ఆ చిన్నారీ మ్యాగీ ప్యాకెట్ కొనేందుకు ఐదు రూపాయలతో షాప్‌కు వెళ్లగా… మ్యాగీ ప్యాకెట్ ధర ఏడు రూపాయలు పెరిగినట్టు షాప్ వ్యక్తి చెప్పాడు. దీంతో ఆ పాప నిరాశతో ఇంటికెళ్లి మళ్లీ కొత్త పెన్సిల్ కోసం మారాం చేయగా తల్లి మందలించింది. దీని అంతటికీ ధరలు పెరగటమే కారణమని గ్రహించిన ఆ చిన్నారి కీర్తి … వెంటనే ధరల పెరుగుదలపై ప్రభాని మోడీకి లేఖ రాసింది. “ ప్రధాన మంత్రి జీ… నాపేరు కీర్తి దూబే. నేను ఒకటో తరగతి చదువుతున్నా. మీరు ధరలు విపరీతంగా పెంచారు. నా పెన్సిల్ , ఎరేజర్ కూడా ఖరీదయ్యాయి. మ్యాగీ ధర కూడా పెరిగింది. నేన పెన్సిల్ అడిగితే మా అమ్మ కొట్టింది. నేను ఏమి చేయాలి ? ఇతర విద్యార్థులు నా పెన్సిల్‌ను దొంగిలించారు. అని హిందీలో రాసి, తండ్రి విశాల్ దూబేకి ఇవ్వగా… న్యాయవాది అయిన తండ్రి తన కుమార్తె రాసిన లేఖను ప్రధాని కార్యాలయానికి సోమవారం రిజిస్టర్ పోస్టు చేశారు. ప్రస్తుతం ఆ లేఖ ఫోటో సోషల్ మీడియాలో విపరీతంగా వైరల్ అవుతోంది.
