తెలంగాణ సాధించడంలో శివాజీ స్ఫూర్తి : మంత్రి హరీష్ రావు

ఛత్రపతి శివాజీ మహారాజ్ యుద్ధ నైపుణ్యం, పరిపాలన తెలంగాణ రాష్ట్రానికి ఆదర్శమని రాష్ట్ర వైద్యారోగ్య, ఆర్థిక శాఖల మంత్రి హరీష్ రావు స్పష్టం చేశారు. గురువారం ఉదయం బాసర జంక్షన్ లో శివాజీ విగ్రహాన్ని మంత్రులు హరీష్ రావు, ఇంద్రకరణ్ రెడ్డి కలిసి ఆవిష్కరించారు. అనంతరం ఏర్పాటు చేసిన సభలో మంత్రి హరీష్ రావు ప్రసంగిస్తూ… బాసర జంక్షన్లో శివాజీ విగ్రహం ఏర్పాటు చేయడం సంతోషకరమని… పరిపాలన, యుద్ద నైపుణ్యంలో అన్నింటా శివాజీ ఆదర్శమని కొనియాడారు. శివాజీ మత సామర్యాన్ని చాటారని, ప్రజలే ప్రభువులుగా ఆయన పాలన సాగిందన్నారు. శివాజీ ఎన్నో యుద్దాలు చేసినా హింసను ప్రోత్సహించలేదని… పవిత్ర స్థలాలు ధ్వంసం చేయలేదని హరీష్ రావు గుర్తు చేశారు. ముఖ్యమంత్రి కేసీఆర్ రాష్ట్రాన్ని సాధించడంలో శివాజీని స్ఫూర్తిగా తీసుకున్నారని పేర్కొన్నారు. అహింసా మార్గంలో 14 ఏండ్లు కేసీఆర్ పోరాటం చేసి… తెలంగాణ సాధించి.. అద్భుత పాలన అందిస్తున్నారని తెలిపారు. అభివృద్ధిలో తెలంగాణ దేశానికి ఆదర్శంగా నిలిచిందని, పక్కనే ఉన్న మహారాష్ట్ర ప్రజలు ఇక్కడి పథకాలు అమలు చేయాలని అక్కడి ప్రభుత్వాన్ని అడుగుతున్నారని హరీష్ రావు గుర్తు చేశారు. ఈ కార్యక్రమంలో ఎమ్మెల్యే విఠల్ రెడ్డి, ఎమ్మెల్సీ దండే విఠల్, వేణుగోపాలచారి, ఇతర ప్రజా ప్రతినిధులు, భారీగా ప్రజలు పాల్గొన్నారు.