తెలంగాణ ప్రాజెక్టులకు జాతీయ హోదా కల్పించండి : ప్రధానిని కోరిన మంత్రి కేటీఆర్

తెలంగాణలోని నీటి ప్రాజెక్టులకు జాతీయ హోదా కల్పించాలని ప్రధాని నరేంద్ర మోదీని రాష్ట్ర ఐటీ, మున్సిపల్‌ శాఖ మంత్రి కేటీఆర్ కోరారు. ప్రాజెక్టులకు జాతీయ హోదా ఇవ్వాలని సీఎం కేసీఆర్‌ గతంలోనే అనేకసార్లు కోరినట్లు గుర్తు చేశారు. కాళేశ్వరం లేదా పాలమూరు ప్రాజెక్టుకు జాతీయ హోదా ఇవ్వాలని విజ్ఞప్తి చేశారు. పోలవరం, ఎగువ భద్ర ప్రాజెక్టు మాదిరిగా.. కాళేశ్వరం ప్రాజెక్టుకు కూడా ప్రాధాన్యం ఇవ్వాలన్నారు. అలాగే రాష్ట్ర ప్రాజెక్టులపై చర్చించేలా ఉన్నతస్థాయి స్టీరింగ్‌ కమిటీని ఆదేశించాలని కేటీఆర్‌ విన్నవించారు. ఈ నెల 6న జరిగే సమావేశంలో ప్రాజెక్టులపై చర్చించేలా కమిటీని ఆదేశించాలని ప్రధానిని కోరుతూ కేటీఆర్‌ ట్వీట్‌ చేశారు.