అరుదైన వ్యాధితో బాధపడుతున్న యువతికి సీఎం కేసీఆర్ ఆర్థిక చేయూత

ఓ అరుదైన వ్యాధితో బాధపడుతున్న యువతికి ఆర్థిక సహకారాన్ని అందించి తన పెద్ద మనసును చాటుకున్నారు సీఎం కేసీఆర్. వ‌న‌ప‌ర్తి నియోజ‌క‌వ‌ర్గం రేవ‌ల్లికి చెందిన ఓ యువతి పరోక్సిస్మాల్ నాక్టర్నాల్ హిమోగ్లోబినురియా అనే అరుదైన వ్యాధితో బాధపడుతోంది. బోన్ మ్యారో ట్రాన్స్‌ప్లాంటేష‌న్‌తో ప్రాణాలు నిలిపే అవ‌కాశం ఉన్నాగానీ, చికిత్సకు 30 లక్షల వరకూ ఖర్చు అవుతుండటంతో.. అసలే ఆర్థిక పరిస్థితి అంతంత మాత్రంగా ఉన్న ఆ కుటుంబం దిక్కు తోచని స్థితిలో ఉంది పోయింది. కాగా బాధితురాలికి ఎంబీబీఎస్‌లో సీటు వ‌చ్చినా కూడా.. ఈ వ్యాధి కార‌ణంగా చ‌దువుకోలేని ప‌రిస్థితి ఏర్ప‌డింది. చివరకు ఈ విషయాన్ని రాష్ట్ర వ్యవసాయ శాఖ మంత్రి సింగిరెడ్డి నిరంజన్ రెడ్డి దృష్టికి రేవల్లి గ్రామస్తులు తీసుకెళ్లగా, ఆయన తక్షణమే స్పందించి బాధితురాలి తండ్రిని పిలిపించి మాట్లాడారు. అనంతరం ఈ విషయాన్ని ముఖ్యమంత్రి కేసీఆర్ దృష్టికి తీసుకెళ్లగా.. ఆయన పెద్దమనసుతో ఆ యువతి చికిత్స నిమిత్తం 25 లక్షల ఎల్‌వోసీని మంజూరు చేశారు. దీంతో సదరు యువతికి హైదరాబాద్ లోని కాంటినెంటల్ ఆసుపత్రిలో చికిత్స నిమిత్తం అడ్మిట్ చేశారు. యువతి కుటుంబ సభ్యులు సీఎం కేసీఆర్, మంత్రి నిరంజన్ రెడ్డికి ప్రత్యేక కృతజ్ఞతలు తెలిపారు.