అధునాతన సాంకేతిక పరిజ్ఞానంతో హైదరాబాద్ రోడ్ల నిర్మాణం : శాసనసభలో మంత్రి కేటీఆర్

హైద‌రాబాద్‌లో చేప‌ట్టిన‌ వ్యూహాత్మ‌క ర‌హ‌దారి అభివృద్ధి ప్రాజెక్టు (ఎస్ఆర్డీపీ) ప్ర‌స్తుత ద‌శ‌పై శాస‌న‌స‌భ‌లో స‌భ్యులు అడిగిన ప్ర‌శ్న‌ల‌కు రాష్ట్ర ఐటీ, పుర‌పాల‌క శాఖ‌ మంత్రి కేటీఆర్ స‌మాధానం ఇచ్చారు. హైద‌రాబాద్‌లో ట్రాఫిక్ ర‌ద్దీని త‌గ్గించేందుకు ఎస్ఆర్డీపీ కింద అనేక ప్రాజెక్టులు చేప‌ట్టామని, భ‌విష్య‌త్‌లో హైద‌రాబాద్‌ ఒక విశ్వ‌న‌గ‌రంగా అవ‌త‌రించాల‌నేది సీఎం కేసీఆర్ ఆకాంక్ష‌ అని, దానిక‌నుగుణంగా ఆలోచ‌న‌తో, ప్రణాళిక‌బ‌ద్దంగా ముందుకు వెళ్తున్నామని పేర్కొన్నారు. ఇందుకోసం అధునాత‌మైన సాంకేతిక ప‌రిజ్ఞానం ఉప‌యోగించి ప్రాజెక్టుల నిర్మాణం వేగంగా కొన‌సాగిస్తున్నామని తెలిపారు. టీడీఆర్ తో జీహెచ్ఎంసీకి రూ.3 వేల కోట్లు ఆదా చేయ‌డం జ‌రిగింద‌న్నారు. భార‌త‌దేశంలోనే మొద‌టిసారిగా టీడీఆర్ బ్యాంకును ఏర్పాటు చేశామ‌న్నారు. ఎస్ఆర్డీపీ కింద ఇప్ప‌టికే రూ.1946.90 కోట్లతో ఇరవై రెండు ప‌నులు పూర్తి చేశామ‌న్నారు. రూ.5,693.51 కోట్ల వ్య‌యంతో మరో ఇరవై నాలుగు ప‌నులు పురోగ‌తిలో ఉన్నాయ‌న్నారు. ఎస్ఆర్డీపీలో భాగంగా కేబుల్ బ్రిడ్జితో పాటు ఫ్లై ఓవ‌ర్, అండ‌ర్ పాస్‌లు నిర్మించామ‌న్నారు. ఇందిరా పార్క్ వ‌ద్ద స్టీల్ బ్రిడ్జి నిర్మాణ పనులు జరుగుతున్నాయన్నారు. సౌత్ జోన్‌లో ఓవైసీ ఫ్లై ఓవ‌ర్‌ను 93.6 కోట్లతో, బ‌హ‌దూర్‌పురా ఫ్లై ఓవ‌ర్‌ను 106 కోట్ల‌తో, చాంద్రాయ‌ణగుట్ట ఫ్లై ఓవ‌ర్‌ను 41.55 కోట్లతో, న‌ల్ల‌గొండ క్రాస్ రోడ్డు టు ఓవైసీ జంక్ష‌న్ 523 కోట్ల‌తో, ఫ‌ల‌క్‌నూమా ఆర్వోబీ రూ.52 కోట్ల‌తో, శాస్త్రిపురం ఆర్వోబీ రూ. 91 కోట్లు, ఆరాంఘ‌ర్ టు జూపార్క్ ఫ్లై ఓవ‌ర్ రూ. 636 కోట్ల‌తో వివిధ ద‌శ‌ల్లో ప‌నులు కొన‌సాగుతున్నాయని మంత్రి కేటీఆర్ శాసనసభకు తెలిపారు.