తెలంగాణ ప్రజలు వనరులు కోల్పోవద్దు-ప్రొ. కోదండరాం

శుక్రవారం మహబూబ్ నగర్ జిల్లా కొల్లాపూర్ లో జరిగిన తెలంగాణ విజయోత్సవ సభలో టీ జేఏసీ చైర్మన్ ప్రొఫెసర్  కోదండరాం పాల్గొని ప్రసంగించారు. తెలంగాణ రాష్ట్రానికి వాటా ప్రకారం రావాల్సిన వనరులను అన్నింటినీ దక్కించుకోవాలని, అందుకు అవసరమైన దారిని వెతుక్కొని ఆ దిశగా పయనించాలని అన్నారు. అభివృద్ధికి అవసరమైన రెండవ దశను ప్రారంభించాలని, ఉద్యమం జాతీయ స్థాయిలో గుర్తింపు పొందినందున తెలంగాణ పునర్నిర్మాణంలో ఆ గుర్తింపు ఉపయోగపడుతుందని స్పష్టం చేశారు. చంద్రబాబు విజన్ 2020 ఎందుకూ పనికి రాకుండా పోయిందని, అందుకే విజన్ విధానాన్ని పాటించాల్సిన పనిలేదని కోదండరాం అన్నారు. ఎంపీ మందా జగన్నాథం మాట్లాడుతూ లగడపాటి జగడపాటి అని రాజ్యసభలో బీజేపీ, టీడీపీ సభ్యులు గోడమీది పిల్లుల్లా ప్రవర్తించారని, వెంకయ్యనాయుడు తన ఆంధ్రా బుద్ధిని బయటపెట్టారని ఆగ్రహం వ్యక్తం చేశారు. ఎమ్మెల్యే జూపల్లి కృష్ణారావు మాట్లాడుతూ తెలంగాణలో సీమాంధ్ర నాయకత్వంలో ఉన్న పార్టీలకు ఓటేస్తే మళ్ళీ తెలంగాణ నీటివనరులను దోచుకుపోయే ప్రమాదం ఉందని, చంద్రబాబు, వైఎస్ సీఎం కావాలనే టీఆర్ఎస్ తో పొత్తుపెట్టుకుని లాభపడ్డారని, అటువంటి సీమాంధ్ర పార్టీల్లో తెలంగాణ ప్రాంత నేతలు పనిచేయడం దారుణమని స్పష్టం చేశారు.