అసెంబ్లీలో అంబేద్కర్ విగ్రహఏర్పాటు టీ జాగృతి కృషిఫలితమే-వివేక్

అసెంబ్లీలో అంబేద్కర్ విగ్రహాన్ని ఏర్పాటుచేసిన కారణంగా సోమాజిగూడ ప్రెస్ క్లబ్ లో తెలంగాణ జాగృతి అధ్యక్షురాలు కవిత అధ్యక్షతన ఒక సమావేశం జరిగింది. ఈ కార్యక్రమానికి ఎంపీ వివేక్, నాగర్ కర్నూల్ ఎంపీ మందా జగన్నాధం, దళిత సంఘాల నాయకులు పాల్గొన్నారు. ముందుగా అంబేద్కర్ చిత్రపటానికి పూలమాలలు వేసి నివాళులర్పించారు. ఎంపీ వివేక్ మాట్లాడుతూ, అంబేద్కర్ విగ్రహం అసెంబ్లీలో ఏర్పాటు చేయడం వెనుక తెలంగాణ జాగృతి కృషి ఎంతో ఉందన్నారు. విగ్రహ రూపురేఖలు సరిగాలేవని వార్తలు వస్తున్న తరుణంలో మరో విగ్రహాన్ని ప్రతిష్ఠించాలన్నారు. క్రిందటేడాది అసెంబ్లీలో విగ్రహ ఏర్పాటు కోసం జాగృతి అధ్యక్షురాలు కవిత రెండురోజుల నిరాహారదీక్ష చేయడాన్ని ఎంపీ మందా జగన్నాధం ప్రశంసించారు. కవిత మాట్లాడుతూ, అంబేద్కర్ చిన్నరాష్ట్రాల ఆవశ్యకత గురించి రాజ్యాంగంలో చెప్పారని, దళిత సంఘాలన్నీ జాగృతితో కలిసి పోరాటం చేయడం వల్లే ఇది సాధ్యమైందని చెప్పారు. విగ్రహం ముఖకవళికల్లో మార్పులు ఉన్నాయని, వాటిని సరిచేయడం లేదా కొత్త విగ్రహాన్ని తయారుచేసి మళ్ళీ ఏర్పాటుచేయాలని విజ్ఞప్తి చేశారు.