ఎంసెట్ ప్రవేశాలను సొంతంగా తెలంగాణ రాష్ట్రంలో నిర్వహించడానికి ప్రత్యేక ఎంసెట్ నోటిఫికేషన్ విడుదల చేయనున్నామని, విధివిధానాలపై శుక్రవారం ఉన్నత విద్యామండలి సమావేశమవుతుందని తెలంగాణ ఉన్నత విద్యామండలి చైర్మన్ ప్రొఫెసర్ పాపిరెడ్డి తెలిపారు. సకాలంలో ఎంసెట్ ప్రవేశాలు పూర్తి చేయడానికి తెలంగాణ రాష్ట్ర ప్రభుత్వం కట్టుబడి ఉందని, ఈనెల 11న సుప్రీంకోర్టు ఇచ్చే తుదితీర్పును గౌరవిస్తామని అన్నారు.
గురువారం సాయంత్రం మూడున్నర గంటలకు పదవీ బాధ్యతలు సీకరించిన అనంతరం జరిగిన విలేకరుల సమావేశంలో పాపిరెడ్డి మాట్లాడారు. ఎంసెట్ ప్రవేశాలకోసం రెండురోజులుగా భారీ ఎత్తున చర్చలు జరుగుతున్నాయని, ఈ విషయంలో తెలంగాణ రాష్ట్ర విద్యార్థులకు ఎలాంటి అన్యాయం జరగదని హామీ ఇచ్చారు. వెబ్ కౌన్సిలింగ్ ను, సర్టిఫికెట్ల వెరిఫికేషన్ ను ఎప్పటినుండి ప్రారంభించాలన్న అంశంపై శుక్రవారం జరిగే భేటీలో సుదీర్ఘంగా చర్చించి తుది నిర్ణయం తీసుకుంటామని చెప్పారు. సుప్రీంకోర్టు ఆదేశాల మేరకు ఈ నెలాఖరులోగా ఎంసెట్ ప్రవేశాలు పూర్తిచేసి సెప్టెంబర్ 1నుండి తరగతులు నిర్వహిస్తామని పాపిరెడ్డి పేర్కొన్నారు.