అమరుల త్యాగాలు వెలకట్టలేనివి

అమరవీరుల తల్లులు, తెలంగాణ వాదులు, అన్ని పార్టీల తెలంగాణ నేతలు పాల్గొన్న తెలంగాణ ధూంధాం విజయోత్సవ సభ ఇందిరాప్రియదర్శిని ఆడిటోరియంలో ఘనంగా జరిగింది. ఈ కార్యక్రమంలో అమరుల తల్లులకు, కుటుంబసభ్యులకు గౌరవ వందనం చేసి సత్కారం చేశారు. రసమయి బాలకిషన్ ఆధ్వర్యంలో వందలాది కళాకారులు ఆలపించిన తెలంగాణ పాటలతో ఆడిటోరియం హోరెత్తిపోయింది. ఉస్మానియా క్యాంపస్ లో ఉదయించిన కిరణమా, వీర తెలంగాణమా వంటి పాటలు పాడగానే సభలో ఉన్నవారందరూ కంటతడి పెట్టుకున్నారు. తెలంగాణ కవి గోరటి వెంకన్న, దేశపతి శ్రీనివాస్ తదితరులు 14 సంవత్సరాల్లో వచ్చిన తెలంగాణ పాటలను పాడి ఆహూతులను కట్టిపడేశారు. తెలంగాణ జేఏసీ చైర్మన్ ప్రొఫెసర్ కోదండరాం మాట్లాడుతూ జూన్ ఒకటవ తేదీ సాయంత్రం నుండి 2 వ తేదీ ఉదయం వరకు లాల్ బహదూర్ స్టేడియంలో తెలంగాణ ధూంధాం ఆధ్వర్యంలో విజయోత్సవ సభను నిర్వహిస్తామని తెలిపారు. టీఆర్ఎస్ ఎమ్మెల్యే హరీష్ రావు మాట్లాడుతూ తెలంగాణ ఉన్నంతవరకు అమరుల చరిత్ర ఉంటుందని, ఇచ్చిన ప్రతిమాట నిలబెట్టుకుంటూ అమరులను, కళాకారులను కంటికిరెప్పలా కాపాడుకుంటామని హామీ ఇచ్చారు. ఎంపీ పొన్నం ప్రభాకర్, కోమటిరెడ్డి రాజగోపాల్ రెడ్డి, మధుయాష్కీ గౌడ్, బీజేపీ ఎమ్మెల్యే కిషన్ రెడ్డి కూడా అమరులను, కళాకారులను తప్పకుండా అన్నివిధాలా ఆదుకుంటామని భరోసా ఇచ్చారు.