వికలాంగులకు 70 లక్షల విలువైన స్కూటీలు, ట్రై సైకిళ్ళు పంపిణీ చేసిన మంత్రి జగదీష్ రెడ్డి

రాష్ట్ర విద్యుత్ శాఖ మంత్రి జగదీష్ రెడ్డి సూర్యాపేట జిల్లా కేంద్రంలో వికలాంగులకు 70 లక్షల విలువైన ట్రై సైకిల్, ల్యాప్ టాప్ లు, స్కూటీలను, సహాయ పరికరాలను పంపిణీ చేశారు. ఈ సందర్భంగా ఆయన బీజేపీ, కాంగ్రెస్ పార్టీలు రాష్ట్ర అభివృద్ధిలో నిర్మాణాత్మక పాత్ర పోషించకుండా, కేవలం విమర్శలకే పరిమితం అయ్యారని ఆగ్రహం వ్యక్తం చేశారు. ప్రతిపక్షాలను ప్రజలెవ్వరు పట్టించుకోవడం లేదని విమర్శించారు. తెలంగాణలో అమలవుతున్న అభివృద్ధి, సంక్షేమ పథకాలు ఒక్క బీజేపీ పాలిత రాష్ట్రంలో కూడా అమలు చేయలేని నిస్సహాయ స్థితిలో బీజేపీ కొట్టుమిట్టాడుతున్నదని, కేవలం మతాల మధ్య చిచ్చు పెడుతూ, పబ్బం గడుపుతున్న బీజేపీని ప్రజలు నమ్మడం లేదని అన్నారు. కాంగ్రెస్ పార్టీ నాయకులు ఇంకా పగటి కలలు కంటున్నారని, సమైక్య పాలనలో నల్గొండ జిల్లాను ఎడారిగా మార్చి, ఇపుడు మొసలి కన్నీరు కారుస్తూ ప్రజలవద్దకు వస్తున్నారని దుయ్యబట్టారు. ప్రతిపక్షాలు ఎన్ని కుయుక్తులు పన్నినా, ఎన్ని ఎత్తులు వేసిన యావత్ తెలంగాణ సమాజం ముఖ్యమంత్రి కేసీఆర్ వెంటే ఉన్నారని మంత్రి అన్నారు. ఈ కార్యక్రమంలో ఎంపీ లింగయ్య యాదవ్, కోదాడ ఎమ్మెల్యే మల్లయ్య యాదవ్, వికలాంగుల కార్పొరేషన్ చైర్మన్ వాసుదేవ రెడ్డి తదితరులు పాల్గొన్నారు.