ఏప్రిల్ 9న గజ్వేల్ లో నామినేషన్ వేయనున్న కేసీఆర్..

ఈ నెల 9న గజ్వేల్ అసెంబ్లీ నియోజకవర్గం నుండి టీఆర్ఎస్ అధినేత కేసీఆర్ నామినేషన్ వేయనున్నారు. ఏప్రిల్ 30న జరగనున్న సార్వత్రిక ఎన్నికల్లో అసెంబ్లీ, పార్లమెంటు స్థానాల్లో పోటీ చేయడానికి గులాబీ బాస్ సిద్ధమౌతున్నారు. అయితే అసెంబ్లీ స్థానానికి తన సొంత జిల్లా మెదక్ లోని గజ్వేల్ నుండి పోటీ చేయనుండగా, పార్లమెంటుకు ఎక్కడినుండి పోటీ చేస్తారనే నిర్ణయం ఇంకా తీసుకోలేదు. టీఆర్ఎస్ఎల్పీ ఉపనేత హరీష్ రావు 8వ తేదీన సిద్దిపేట నియోజకవర్గం నుండి నామినేషన్ వేయనున్నారని తెలిసింది. ఈ నెల 4న టీఆర్ఎస్ పార్టీ 70మంది అభ్యర్థులతో కూడిన తొలి జాబితా ప్రకటించనుంది. వేరే పార్టీలతో పొత్తు కుదిరినా, కుదరకపోయినా అభ్యర్థులను ప్రకటించాలని పార్టీనేతలు అభిప్రాయపడుతున్నారు. అదేరోజు టీఆర్ఎస్ ఎన్నికల మేనిఫెస్టో కూడా విడుదల చేయాలని, అభ్యర్థులకు బీఫారాలు అందజేయాలని నిర్ణయించారు. వారందరితో ఉద్యమంలో భాగస్వామ్యమైనట్లుగానే తెలంగాణ పునర్నిర్మాణానికి అంకితమౌతామని ప్రతిజ్ఞ చేయించాలని కేసీఆర్ అనుకుంటున్నట్లు తెలిసింది. కేకే నివాసంలో నిన్న జరిగిన సమావేశంలో టీఆర్ఎస్ పొత్తుల కమిటీ, ఎన్నికల కమిటీ సభ్యులు పాల్గొని అభ్యర్థుల జాబితాపై చర్చించిన అనంతరం కేసీఆర్ ను కలిసి చర్చల్లో వచ్చిన అనేక అంశాలను ఆయనకు విశదీకరించారు.