ఇల్లు అలకగానే పండగ కాదు- కేసీఆర్

వైసీపీ నేత బాజిరెడ్డి గోవర్ధన్ రెడ్డి తెలంగాణ భవన్ లో టీఆర్ఎస్ అధినేత కేసీఆర్ సమక్షంలో టీఆర్ఎస్ పార్టీలో చేరారు. పార్టీ కన్డువాను కప్పి గోవర్ధన్ ను టీఆర్ఎస్ పార్టీలోకి ఆహ్వానించిన తర్వాత కేసీఆర్ మాట్లాడుతూ, ‘ఇల్లు అలకగానే పండగ కాదని, తెలంగాణ ప్రజల కోటి ఆశలు నెరవేరాలని, ఆంధ్రా పార్టీల చేతిలో మోసపోతే గోసపడుతామని’ అన్నారు. పార్టీ క్యాడర్ ప్రజలకు అన్ని విషయాలు తెలపాలని, తెలంగాణ కోసం ఎవరు కొట్లాడారో వారి చేతిలోనే అధికారం ఉండాలని, అప్పుడే తెలంగాణ ప్రజల కోరికలు, కలలు తీరుతాయని పేర్కొన్నారు. చంద్రబాబునాయుడు, వెంకయ్యనాయుడు ఇద్దరూ తెలంగాణలో సుస్థిర ప్రభుత్వం రాకుండా కుట్రలు చేస్తున్నారని మండిపడ్డారు. సమైఖ్యాంధ్ర ముఖ్యమంత్రులు ఉద్యమాన్ని ఎగతాళి చేశారని, కాంగ్రెస్, టీడీపీ పార్టీలు మనం చూడనివా అని, ఆ పార్టీలకు ఓటు వేస్తే మనం మోసపోతామని చెప్పారు. తెలంగాణపై వైసీపీ వ్యతిరేకత వ్యక్తం చేసినప్పుడు మొదటగా కొండా సురేఖ, బాజిరెడ్డి గోవర్ధన్ రెడ్డి రాజీనామా చేశారని కేసీఆర్ గుర్తుచేశారు. ఒకప్పుడు అత్యంత ధనవంత జిల్లాల్లో నిజామాబాద్ ఒకటని, ఇప్పుడు అదే జిల్లాలో కరువు తాండవిస్తుందని ఆవేదన వ్యక్తం చేశారు. ప్రపంచంలోనే అతి పెద్ద ప్రాజెక్టు నిజాంసాగర్ ప్రాజెక్టు అని, సీమాంధ్ర పెత్తందారులవల్ల ప్రాజెక్టుకు నీళ్ళురాకుండా అయ్యిందని విమర్శించారు.