ఘనంగా జరిగిన కేసీఆర్ పుట్టినరోజు వేడుకలు

టీఆర్ఎస్ అధినేత కే.చంద్రశేఖర్ రావు 60వ జన్మదిన వేడుకలు సోమవారం నాడు ఘనంగా జరిగాయి. ఢిల్లీలోని తన నివాసంలో కేసీఆర్ తన మనవడు హిమాన్షు తో కలిసి కుటుంబసభ్యుల మధ్య తన పుట్టినరోజును జరుపుకున్నారు. తెలంగాణలోని పదిజిల్లాల్లో కూడా పెద్దఎత్తున కేసీఆర్ జన్మదిన వేడుకలు అంబరాన్నంటాయి. ఢిల్లీకి చేరుకున్న వేలాదిమంది తెలంగాణ వాదులు, ప్రముఖులు కేసీఆర్ కు శుభాకాంక్షలు తెలిపేందుకు క్యూ కట్టారు. కరీంనగర్ టీఆర్ఎస్ యూత్ ప్రెసిడెంట్ కే. సతీష్ తయారుచేయించిన 60 కిలోల కేక్ ను కేసీఆర్ కట్ చేశారు. కేంద్రమంత్రి జైపాల్ రెడ్డి, టీఆర్ఎస్ సెక్రటరీ జనరల్ కేకే, ఎంపీ వివేక్, ఎంపీ మందా జగన్నాధం, నాయిని నరసింహారెడ్డి, మాజీ ఎంపీ వినోద్, టీఆర్ఎస్ ఎమ్మెల్యేలు హరీష్ రావు, కేటీఆర్, ఈటెల రాజేందర్, తెలంగాణ జేఏసీ చైర్మన్ ప్రొఫెసర్ కోదండరాం, ఇతర జేఏసీ నేతలు, తెలంగాణ జర్నలిస్టుల ఫోరం నేతలు తదితరులు కేసీఆర్ కు శుభాకాంక్షలు తెలియజేసారు. కేసీఆర్ పుట్టినరోజు సందర్భంగా హైదరాబాద్ తెలంగాణ భవన్ లో ఏర్పాటు చేసిన రక్తదాన శిబిరాన్ని తెలంగాణ జాగృతి అధ్యక్షురాలు కవిత ప్రారంభించారు. ఈ కార్యక్రమంలో పలువురు టీఆర్ఎస్ కార్యకర్తలు పాల్గొని రక్తదానం చేశారు.