బీజేపీ ఆధ్వర్యంలో తెలంగాణ ఆవిర్భావ అభినందన సభ

హైదరాబాద్ నిజాం కాలేజీ గ్రౌండ్స్ లో మంగళవారం సాయంత్రం బీజేపీ ఆధ్వర్యంలో తెలంగాణ ఆవిర్భావ అభినందన సభను నిర్వహించనున్నారు. ఈ కార్యక్రమానికి బీజేపీ జాతీయ అధ్యక్షుడు రాజ్ నాథ్ సింగ్, రాజ్యసభ ప్రతిపక్ష నేత అరుణ్ జైట్లీ హాజరుకానున్నారు. సభ నిర్వహణ బాధ్యతలను బీజేపీ రాష్ట్ర అధ్యక్షుడు జీ. కిషన్ రెడ్డి, యెండల లక్ష్మీనారాయణ తదితరులు నిర్వహిస్తున్నారు. పార్లమెంటులో తెలంగాణ బిల్లుకు మద్దతిచ్చి రాష్ట్ర ఏర్పాటుకు సహకరించిన బీజేపీ ఇదే అంశాన్ని తమ ప్రచారానికి ఉపయోగించుకోవాలనే ఉద్దేశంతోనే ఈ సభను నిర్వహిస్తుందని పలువురి అభిప్రాయం. తెలంగాణలోని పదిజిల్లాల నుండి భారీ సంఖ్యలో జనాన్ని రప్పించడానికి ప్రయత్నాలు ముమ్మరం చేసింది. మధ్యాహ్నం 12.45నిమిషాలకు హైదరాబాద్ చేరుకోనున్న రాజ్ నాథ్ సింగ్ ఇటీవల మరణించిన బీజేపీ మాజీ జాతీయ అధ్యక్షుడు బంగారు లక్ష్మణ్ కుటుంబ సభ్యులను పరామర్శించిన తర్వాత కాసేపు విశ్రాంతి తీసుకుని సాయంత్రం 5 గంటలకు జరిగే బహిరంగ సభలో పాల్గొంటారు.