జగన్ ను అడ్డుకుంటాం – ఖమ్మం జిల్లా టీ జేఏసీ

తెలంగాణను అడ్డుకోవడానికి అడుగడుగునా కుట్రలు పన్నిన వైఎస్సార్సీపీ అధ్యక్షుడు జగన్ ఖమ్మంలో అడుగుపెడితే ఊరుకోమని, అడ్డుకుని తీరుతామని ఖమ్మం తెలంగాణ జేఏసీ స్పష్టం చేసింది. తెలంగాణ ఉభయసభల్లో ఆమోదం పొంది రాష్ట్రపతి ముద్ర వేసినా తెలంగాణను అడ్డుకుంటానని అంటున్న జగన్ ఎలా తెలంగాణలో పర్యటిస్తాడో చూస్తామని హెచ్చరించారు. ఆదివారం ఖమ్మం కలెక్టరేట్ లో జరిగిన విలేకరుల సమావేశంలో జేఏసీ నేతలు పాల్గొన్నారు. జగన్ ఖమ్మం పర్యటన మరో మానుకొట అవుతుందని, కడప అహంకారానికి, ఖమ్మం ఆత్మగౌరవానికి మధ్య జరిగే పోరాటంగా ఈ పర్యటనను అభివర్ణించారు. ఈ నెల ఐదున ఖమ్మంలో జగన్ పాల్గొనే సభను నిరసిస్తూ సోమవారం మహార్యాలీ చేపట్టి 5 న ఖమ్మం బంద్ కు పిలుపునిస్తామని చెప్పారు. సీపీఐ నేతలు కూడా మొదటిసారి జేఏసీతో కలిసి ఈ సమావేశంలో పాల్గొన్నారు. టీ జేఏసీ జిల్లా చైర్మన్ కూరపాటి రంగరాజు, టీఆర్ఎస్ జిల్లా కన్వీనర్ డి. రాజేందర్, న్యూ డెమోక్రసీ జిల్లా కార్యదర్శి పోటు రంగారావు, ఉద్యోగ జేఏసీ నేతలు వెంకటపతిరాజు తదితరులు పాల్గొన్నారు.