బీఫాంలపై సంతకాలు పెట్టిన గులాబీ బాస్

మరికొద్ది రోజుల్లో ప్రారంభమయ్యే స్థానిక, మున్సిపల్ ఎన్నికల్లో పోటీ చేసే టీఆర్ఎస్ అభ్యర్థులకు ఇచ్చే బీఫాంలపై టీఆర్ఎస్ అధినేత కేసీఆర్ సంతకాలు పెట్టారు. గత రెండు రోజులుగా ఆయన ఇదే పనిలో ఉన్నట్లు పార్టీ వర్గాలు తెలిపాయి. ఈ రెండు ఎన్నికలకు నామినేషన్ వేయడానికి ఇంకా సమయం ఉన్నందున మంగళవారం నుండిగానీ, బుధవారం నుండిగానీ బీఫాం లను అందజేస్తామని పార్టీ శ్రేణులు తెలిపాయి. ఈ మూడు నెలలూ ఎన్నికల సీజన్ కావడంతో రాజకీయ నాయకులు, ప్రజలు పూర్తిగా బిజీ కానున్నారు. ఇప్పటికే లోక్ సభ, అసెంబ్లీ ఎన్నికలకు సంబంధించి కేంద్ర ఎన్నికల కమిషన్ నోటిఫికేషన్ జారీ చేయగా, తాజాగా ఇప్పుడు రాష్ట్ర ఎన్నికల కమిషన్ మున్సిపాల్టీలు, కార్పొరేషన్లకు, జిల్లా పరిషత్, మండల పరిషత్, జెడ్పీటీసీ, ఎంపీటీసీ లకు నోటిఫికేషన్ షెడ్యూల్ విడుదల చేసింది. మార్చి 30న మున్సిపల్, స్థానిక ఎన్నికలు జరగనుండగా, జెడ్పీటీసీ, ఎంపీటీసీ, జిల్లా పరిషత్, మండల పరిషత్ ఎన్నికలు ఏప్రిల్ 6న జరగనున్నాయి. అవసరమైతే ఏప్రిల్ 7న రీపోలింగ్ జరపనున్నారు. ఓట్ల లెక్కింపు 8న జరిపి ఫలితాలు అదే రోజు వెల్లడించనున్నారు.