అంబరాన్నంటిన తెలంగాణ సంబురాలు

చిరకాల నిరీక్షణ ఫలించి తెలంగాణ రాష్ట్రం ముంగిట్లోకి అడుగుపెట్టిన వేళ సంబరాలు మిన్నంటాయి. దశాబ్దాల సీమాంధ్ర నిరంకుశ పాలననుండి సంకెళ్ళు తెంచుకుని స్వేచ్ఛగా విహరించేందుకు తెలంగాణ రాష్ట్రం సన్నద్ధమయ్యింది. మంగళవారం లోక్ సభలో తెలంగాణ బిల్లు పాసవ్వడంతో తెలంగాణ పదిజిల్లాల్లో ప్రజలు రోడ్లపైకి వచ్చి పటాసులు పేల్చి స్వీట్లు పంచుకున్నారు. జై తెలంగాణ, జయహో తెలంగాణ అంటూ అరిచిన నినాదాలు మిన్నంటాయి. టీఆర్ఎస్, తెలంగాణ జేఏసీ, టీజేఎఫ్, జాగృతి, సీపీఐ, బీజేపీ, న్యూడెమోక్రసీ, విద్యార్థి సంఘాలు, ఉద్యోగులు, కార్మికులు, న్యాయవాదులు నృత్యాలు చేస్తూ రంగులు చల్లుకున్నారు. కేసీఆర్ దీక్ష ఫలితమే తెలంగాణ రాష్ట్ర ఏర్పాటు అని, అమరవీరులకు ఈ విజయం అంకితమని అన్నారు. వరంగల్ జిల్లా హన్మకొండలోని అమరవీరుల స్థూపం వద్ద టీఆర్ఎస్, విద్యార్థులు, జర్నలిస్టులు, న్యాయవాదులు, తెలంగాణ వాదులు ర్యాలీ నిర్వహించి కాళోజీ, ప్రొఫెసర్ జయశంకర్ సార్ విగ్రహాల వద్ద నివాళులర్పించి పటాసులు పేల్చారు. కరీంనగర్ తెలంగాణ చౌక్ లో తెలంగాణ వాదులు నృత్యాలు చేశారు. ఖమ్మం జిల్లాలో సోనియాగాంధీ చిత్రపటానికి పూలమాలలు వేశారు. మెదక్ జిల్లాలో తెలంగాణ తల్లికి, కేసీఆర్ చిత్రపటానికి పాలాభిషేకం చేశారు. నిజామాబాద్ జిల్లాలో అన్నిపార్టీల నేతలు ర్యాలీలు నిర్వహించి జయశంకర్ సార్ విగ్రహానికి పూలమాలలు వేసి నివాళులర్పించారు.