సీఎస్ పీకే మహంతి అత్యుత్సాహం!

అసెంబ్లీలో తెలంగాణ బిల్లుపై చర్చ సందర్భంగా మరికొన్ని రోజులు గడువు పెంచమని కేంద్రానికి ప్రభుత్వ ప్రధాన కార్యదర్శి పీకే మహంతి లేఖ వ్రాయడం రాజ్యాంగ విరుద్ధమని, ఎగ్జిక్యూటివ్ స్థాయిలో ఉన్న పీఎస్ ఇలా అసెంబ్లీ వ్యవహారాల్లో జోక్యం చేసుకోవడం సర్వత్రా విమర్శలకు తావిస్తుందని రాజ్యాంగ నిపుణులు హెచ్చరిస్తున్నారు. కొద్ది రోజుల్లో సీఎస్ పదవీకాలం ముగుస్తుండటంతో మరో మూడు నెలలపాటు పొడిగించుకోవడానికే ఆయన ఈ విధంగా చేసిఉంటారని వార్తలు వస్తున్నాయి. అంతకుముందు కూడా మంత్రుల నిర్ణయంతో ప్రమేయం లేకుండా బిల్లులో ఉన్న అంశాలగురించి ప్రస్తావిస్తూ ఒక లేఖ కేంద్రానికి రాయడం జరిగింది. ఈ విషయంపై కొందరు మంత్రులు ఆయన వైఖరిపట్ల తీవ్ర అసహనం వ్యక్తం చేశారు. గడువుపెంపు కోసం కేంద్రానికి లేఖ వ్రాయమని సీఎం తనకు సూచించినా సభ్యులంతా ఒకే తాటిమీద లేకపోవడంతో తాను నిరాకరించానని స్పీకర్ నాదెండ్ల మనోహర్ చెప్పారు. ఈ విషయంలో స్పీకర్ కానీ, కౌన్సిల్ చైర్మన్ మాత్రమే నిర్ణయం తీసుకోవాలని, ఇతరులెవరికీ అధికారం లేదని రాజ్యాంగ నిపుణుల వాదన.