![](https://i0.wp.com/missiontelangana.com/wp-content/uploads/2024/01/InShot_20240108_180033813.jpg?resize=1024%2C576&ssl=1)
ఈనాడు, ఆంధ్రజ్యోతి లాంటి ప్రముఖ పత్రికలు కూడా ఈ నగరానికి ఏమైంది అని ఫ్రంట్ పేజిలో వార్తలు రాస్తున్నాయి అంటే నగరంలో శాంతి భద్రతలు పూర్తిగా అదుపుతప్పాయని అర్థం అని బీఆర్ఎస్ వర్కింగ్ ప్రెసిడెంట్ కేటీఆర్ పేర్కొన్నారు.
పరిపాలనా అనుభవం లేని నాయకత్వం ఎలా ఉంటుందో హైదరాబాద్ నుండి తెలంగాణ పల్లెటూరు వరకూ అంతటా కనిపిస్తోంది. బ్రాండ్ హైదరాబాద్ ఎందుకు మసకబారుతోంది.. విశ్వనగరంగా ఎదుగుతున్న వేళ.. ఎందుకింత కళ కోల్పోతోంది అని ఆవేదన చెందారు.
సగటు హైదరాబాదీకి కలుగుతున్న భావన ఇది.హైదరాబాద్ను ప్రేమించే ప్రతి ఒక్కరిలో ఉన్న ఆవేదన ఇది. పదేళ్ళు ప్రశాంతంగా ఉన్న నగరంలో పెరిగిపోతున్న వరుస హత్యలు.. పేట్రేగిపోతున్న అంతరాష్ట్ర ముఠాలు. రాజధాని హైదరాబాద్లో శాంతి లేదు.. నగర ప్రజల జీవితాలకు భద్రత లేదు అని కేటీఆర్ దుయ్యబట్టారు.
సీఎం గారు స్వయంగా పోలీసు కమాండ్ కంట్రోల్ సెంటర్కు వస్తున్నా.. పోలీసింగ్పై కమాండ్ ఏది.. క్షీణిస్తున్న శాంతిభద్రతలపై కంట్రోల్ ఏది. ఓవైపు.. కుప్పకూలిన రియల్ ఎస్టేట్ రంగం.. పరిపాలనా వైఫల్యాన్ని వేలెత్తి చూపుతోంది. మరోవైపు.. పడగవిప్పిన హత్యల సంస్కృతి.. ప్రతి కుటుంబంలో వణుకు పుట్టిస్తోంది. ఇంకోవైపు.. తరలిపోతున్న పెట్టుబడుల పర్వం.. యువత ఉపాధి అవకాశాల్ని దెబ్బతీస్తోంది అని ధ్వజమెత్తారు.
కాంగ్రెస్ పవర్లోకి రాగానే గడియ గడియకు పవర్ కట్ ఏమిటి.
సేఫ్ సిటీగా ఉన్న మహానగరంలో.. క్రైం రేట్ ఎందుకు పెరుగుతోంది. ఇదేనా మీరు తెస్తానన్న మార్పు అని ప్రశ్నించారు.
విశ్వనగరంగా తీర్చిదిద్దడానికి..పదేళ్లు కష్టపడి పునాదులు వేస్తే.. అధికారంలోకి రాగానే ఆగం చేస్తే ఎలా. ప్రపంచంతో పోటీపడే నగరంగా
ఎదుగుతున్న హైదరాబాద్ ప్రగతికి అర్ధాంతరంగా బ్రేకులు వేస్తే ఎలా.. దేశ రాజధాని చుట్టూ.. రాజకీయ చక్కర్లు కొట్టడంపై ఉన్న శ్రద్ధ.. చిక్కుల్లో కొట్టుమిట్టాడుతున్న రాష్ట్ర రాజధానిపై లేకపోతే ఎలా అని కేటీఆర్ అడిగారు.
హైదరాబాద్ అంటే కేవలం రాజధాని కాదు.. తెలంగాణ ఎకనమిక్ ఇంజన్. ఇకనైనా కాంగ్రెస్ సర్కారు మేల్కొనకపోతే.. మన హైదరాబాద్ దెబ్బతింటే.. రాష్ట్రానికి కష్టమే కాదు.. యావత్ దేశానికి కూడా నష్టం అని పేర్కొన్నారు.