- ఓఆర్ఆర్ గ్రీనరీకి ముగ్దులైన ఐఎఫ్ఎస్ టీమ్
- ఓఆర్ఆర్ డ్రిప్ సిస్టమ్, ఫ్లవరింగ్ ప్లాంట్స్ పై అధ్యయనం
- ఓఆర్ఆర్ గ్రీనరీ ప్రత్యేకతలను వివరించిన డైరెక్టర్ ప్రభాకర్
హైదరాబాద్ : ఔటర్ రింగ్ రోడ్ (ఓఆర్ఆర్) గ్రీనరీని చూసి ఇండియన్ ఫారెస్ట్ సర్వీస్(ఐఎఫ్ఎస్) ఆఫీసర్స్ ఫిదా అయిపోయారు. దేశంలో ఎక్కడా లేని విధంగా ఏకంగా 160 కిలోమీటర్ల మేరకు గ్రీనరీ మెయింటెనెన్స్ కోసం నిరంతరంగా పనిచేసే ఓఆర్ఆర్ డ్రిప్ సిస్టమ్ స్కాడా సెంటర్ పనితీరును ఐఎఫ్ఎస్ అధికారుల బృందం అధ్యయనం చేసింది. 1989 నుంచి 2014 బ్యాచ్ లకు చెందిన తొమ్మిది రాష్ట్రాల నుంచి పదహారు (16) మంది ఐఎఫ్ఎస్ అధికారుల బృందం “ఎన్విరాన్ మెంటల్ ఇంపాక్ట్ అసెస్ మెంట్ : నీడ్ అండ్ మెథడ్స్ ఫర్ అసెస్ మెంట్” అనే అంశంపై కంపల్సరీ ట్రైనింగ్ కోర్స్ లో భాగంగా మంగళవారం ఉదయం ఔటర్ రింగ్ రోడ్డు (ఓఆర్ఆర్) గ్రీనరీని ఆధ్యాంతం సందర్శించారు. వీరిలో సీనియర్ అధికారి 1989 (ఒరిస్సా క్యాడర్) బ్యాచ్ కు చెందిన పిసిసిఎఫ్ ఓంప్రకాష్ సింగ్ కూడా ఉన్నారు. ఓఆర్ఆర్ గ్రీనరీ నిర్వహణలో తీసుకుంటున్న ప్రత్యేక శ్రద్ధపై వారు అడిగి తెలుసుకున్నారు.
ఈ సందర్భంగా హెచ్ఎండిఏ అర్బన్ ఫారెస్ట్ డైరెక్టర్ డాక్టర్ బి.ప్రభాకర్ ఓఆర్ఆర్ గ్రీనరీ నిర్వహణలో తీసుకుంటున్న మెలకువలను వివరించారు. వరల్డ్ గ్రీన్ సిటీ అవార్డు అందుకున్న తర్వాత తమ బాధ్యత ఎంతో పెరిగిందని తెలిపారు. మున్సిపల్ శాఖ మంత్రి కేటీ రామారావు గారి మార్గ దర్శకంతో, మెట్రోపాలిటన్ కమిషనర్ ఆర్విoద్ కుమార్ పర్యవేక్షణలో అనతి కాలంలోనే ఔటర్ రింగ్ రోడ్డు గ్రీనరీ మెయింటెనెన్స్ కోసం ప్రత్యేకంగా డ్రిప్ సిస్టమ్ ఏర్పాటు చేయడం జరిగిందని, రాత్రివేళ ప్రమాదాలు చోటు చేసుకోకుండా ఉండేందుకు ఓఆర్ఆర్ మొత్తం సెంట్రల్ లైటింగ్ (విద్యుదీకరణ) ఏర్పాట్లు జరిగాయని ప్రభాకర్ వారికి వివరించారు. ఓఆర్ఆర్ క్షేత్రస్థాయి పర్యటన తదుపరి నానక్ రామ్ గూడ లోని ఓఆర్ఆర్ డ్రిప్ ఆటోమేషన్ సెంటర్ పనితీరును ఐఎఫ్ఎస్ అధికారుల బృందం అధ్యయనం చేసింది. ఓఆర్ఆర్ మీద వివిధ రకాల ఫ్లవరింగ్ ప్లాంట్స్ చూసి ముగ్దులయ్యారు. ఏడాది పొడవునా ఔటర్ రింగ్ రోడ్డుపై పూల మొక్కలు కనువిందు చేస్తాయని డైరెక్టర్ ప్రభాకర్ వారికి వెల్లడించారు. ఔటర్ రింగ్ రోడ్డు వెంట సర్వీస్ రోడ్ లో ఉన్న సోలార్ సైకిల్ ట్రాక్ పనులను కూడా ఐఎఫ్ఎస్ అధికారుల బృందం పరిశీలించింది. ఆ తర్వాత హెచ్ఎండిఏ దుండిగల్ నర్సరీని కూడా వారు పరిశీలించారు.