ఎనుముల రేవంత్ రెడ్డి కాదు ఎగవేతల రేవంత్ రెడ్డి: హరీష్ రావు

కాంగ్రెస్ ప్రభుత్వం రూ. రెండు లక్షల రైతు రుణమాఫీ చేయాలని డిమాండ్ చేస్తూ సిద్దిపేట జిల్లా నంగునూరులో రైతులు నిర్వహించిన ధర్నాలో మాజీ మంత్రి హరీష్ రావు పాల్గొన్నారు. ఈ సందర్భంగా హరీష్ రావు మాట్లాడుతూ.. ఏదో సామెత అన్నట్టు పాలేవో నీళ్ళేవో తేలాలంటే కొద్దిగా టైం పడుతది. కేసీఆర్ గారు ఉన్నప్పుడు రైతులు ఏ విధంగా ఉండే కాంగ్రెస్ పాలనలో రైతుల పరిస్థితి ఎలా ఉంది అనేది అందరికీ అర్థమైంది అని పేర్కొన్నారు.

కేసీఆర్ ముఖ్యమంత్రి కాకముందు రైతుల పరిస్థితి ఎలా ఉండే. రైతులకు ఎరువు బస్తా కావాలంటే పొద్దున ఐదు గంటలకు చెప్పు లైన్లో పెడితే ఒక్క ఎరువు బస్తా దొరికేది. రైతులను ఎరువు బస్తాల కోసం లైన్ల నిలబెట్టింది కాంగ్రెస్. కేసీఆర్ గారు ప్రతి ఊరికి ఎరువులను లారీల్లో పంపి రైతులకు అందించారు అని గుర్తు చేశారు.

కేసీఆర్ రాకముందు కాలిపోయే మోటర్లు పేలిపోయే ట్రాన్స్‌ఫార్మర్లు.. కేసీఆర్ వచ్చినంక 24 గంటల కరెంటు ఇచ్చిండు. ట్రాన్స్‌ఫార్మర్లు కాలకుండా కడుపునిండా రైతులకు కరెంటు ఇచ్చిండు కాంగ్రెస్ పాలనలో దొంగ రాత్రి కరెంట్ వచ్చేది. కేసీఆర్ 24 గంటలు కరెంట్ అందించాడు. మళ్ళీ కాంగ్రెస్ పాలనలో కాలిపోయే మోటర్లు, పేలిపోయే ట్రాన్స్‌ఫార్మర్లు అని మండిపడ్డారు.

కేసీఆర్ ఉండంగా ఫార్మరే ఫస్టు. కరోనా వచ్చినప్పుడు 45 రోజులు లాక్‌డౌన్ ఉంటే గవర్నమెంట్‌కి రూపాయి ఆదాయం లేదు. అయినా కేసీఆర్ రేషన్ కార్డు మీద రూ. 1,500 రూపాయలు ఇచ్చిండు. బియ్యం పంపిండు అందర్నీ ఆదుకున్నాడు. కరోనా వచ్చినప్పుడు కూడా రైతులకు రైతుబంధు వేసిన ముఖ్యమంత్రి కేసీఆర్. గవర్నమెంట్‌కి ఆదాయం లేకపోయినా ఎమ్మెల్యేల, మంత్రుల జీతాలు బంద్ పెట్టిండు కానీ రైతులకు మాత్రం రైతుబంధు ఇచ్చిండు. అది కేసీఆర్‌కు రైతు మీదున్న ప్రేమ. కాంగ్రెస్ ప్రభుత్వానికి ఏమైంది? కరోనా లేదు అయినా కూడా కాంగ్రెస్ ప్రభుత్వం రైతుబంధు ఇవ్వడం లేదు అని విమర్శించారు.

కేసీఆర్ ఉండగా నాట్లు పడే వరకు రైతుల ఫోన్లలో టింగు టింగ్ అని రైతుబంధు పడేది. ఇప్పుడు నాట్లు అయి, కలుపై, పంటకు మందు కొట్టుడు కూడా అయిపోయింది. పంట కోతకు ఉన్నా, దసరా పండుగ దగ్గరకు వస్తున్నా ఇంకా రైతుబంధు పడలేదు. మాటలు మాత్రం కోటలు దాటుతాయి. అన్ని వంకర మాటలే కానీ రైతులకు మాత్రం రైతుబంధు వేస్తలేడు రేవంత్ రెడ్డి అని అన్నారు.

రైతుబంధుకు కేసీఆర్ ఉండంగా ఎకరానికి రూ.4,000 ఇచ్చిండు. మల్ల గెలిస్తే రూ.5,000 ఇస్తానని ఇచ్చిండు. మళ్లీ గెలిస్తే రూ. 8,000 చేస్తా అన్నాడు గెలిస్తే చేస్తుండే. కాంగ్రెస్ గెలిచి రూ. 7,500 రైతుబంధు ఇస్తా అన్నారు. పోయిన యాసంగికి రూ. 5,000 ఇచ్చిండ్రు. ఈ పంటకు మొత్తానికి ఎగబెట్టారు. రైతులను అప్పుల పాలు చేస్తున్నడు రేవంత్ రెడ్డి. పంట పెట్టుబడి కోసం రైతులు అప్పులు చేసే పరిస్థితి ఏర్పడింది అని ఆవేదన వ్యక్తం చేశారు.

అబద్ధాలు చెప్పి కుంటి సాకులు చెప్పి ఇప్పటిదాకా రైతులకు రైతుబంధు పైసలు ఇవ్వలేదు రాష్ట్రంలో రైతులను ఆగం చేయడం కాదా? కేసీఆర్ ఒక్కసారి కాదు 11 సార్లు రైతుబంధు ఇచ్చిండు. ఊరు ఊరుకి కొనుగోలు కేంద్రాలు పెట్టి టైంకు వడ్లు కొనుడు అయినా, వడ్లను కొన్న పైసలు కూడా మూడు రోజులనే రైతులకు అందించిండు కేసీఆర్. కేసీఆర్ వచ్చినంకనే రైతుల భూముల విలువలు పెరిగినాయి అని అన్నారు.

కేసీఆర్ రాకముందు ఎకరం రూ. 5 లక్షలు కూడా పోకపోయేది. కేసీఆర్ వచ్చినంక 24 గంటలు కరెంటు ఇచ్చి చెరువులు మంచిగా చేసి రిజర్వాయర్లు కట్టి రెండు పంటలు నీళ్లు ఇచ్చి రైతు విలువ పెంచిండు. రైతు విలువతో పాటు రైతు భూమి విలువ కూడా పెరిగింది. కాంగ్రెస్ వచ్చింది రైతు విలువ తగ్గించింది అని ఆరోపించారు.

మిషన్ కాకతీయతో ప్రతి ఊర్లో చెరువులు మంచిగా చేసుకున్నాం. ఈరోజు ఏ ఊర్లో చూసినా చెరువులు నిండుకుండల్లా ఉన్నాయి. కట్టలు మంచిగా చేసినం. తూములు మంచిగా చేసినం. అలుగులు మంచిగా చేసినం. అందుకనే ఈరోజు ప్రతి ఊర్లో చెరువులు మంచిగున్నాయి. రేవంత్ రెడ్డి కాళేశ్వరం కూలిపోయింది అంటున్నాడు. వచ్చి రంగనాయక సాగర్, మల్లన్న సాగర్ చూడు రేవంత్ రెడ్డి. కాళేశ్వరం కూలిపోతే నీళ్లు ఎట్లా వచ్చినాయో చూడు అని ధ్వజమెత్తారు.

రేవంత్ రెడ్డికి కూలగొట్టుడు తప్ప కట్టుడు తెలవదు. కాళేశ్వరంలో 100 భాగాలు ఉంటాయి. ఒక్క భాగంలో 160 పిల్లర్లలో రెండు పిల్లర్లకి చిన్న పగుళ్లు వచ్చినాయి దానికి కాళేశ్వరం మొత్తం కూలిపోయిందని అబద్ధ ప్రచారం చేస్తున్నాడు. ఎన్నడైనా ఏదైనా కట్టిన ముఖం అయితే రేవంత్ రెడ్డికి తెలిసేది. 100 భాగాల కాళేశ్వరంలో మూడు బ్యారేజీలు, 19 పంప్ హౌస్‌లు, 18 రిజర్వాయర్లు, సొరంగాలు, కాలువలు, పైపులైన్లు. ఇండ్ల రెండు పిల్లర్లకు మాత్రమే పగుళ్లు వచ్చాయి. మల్లన్న సాగర్, కొండపోచమ్మ సాగర్, రంగనాయక సాగర్‌లో నీళ్లు ఎక్కడి నుంచి వచ్చినాయి? ఈ వానకాలానికి నీళ్లు ఎక్కడి నుంచి వచ్చాయి? అని హరీష్ రావు ప్రశ్నించారు.

కేసీఆర్ వచ్చి కాళేశ్వరం కట్టినంక రైతులకు రెండు పంటలు పండుతున్నాయి. ఎరువులకు బాధ లేదు. పంట పెట్టుబడికి బాధ లేదు. పండిన పంటను ఎవరైనా కొంటారా అనే బాధ లేకుండా చేసిండు కేసీఆర్. రైతుబంధును రూ. 7,500 చేస్తా అన్నాడు. రూ. 2 లక్షల రుణమాఫీ చేస్తా అన్నారు. వడ్లకు బోనస్ ఇస్తామన్నారు. రైతులకు ఇచ్చిన ఏ హామీ రేవంత్ రెడ్డి నెరవేర్చలేదు. వడ్లకు బోనస్ ఇచ్చిండ్రా? ఎన్నికల అప్పుడేమో వడ్లకు బోనస్ అన్నారు ఇప్పుడేమో సన్నాలకు మాత్రమే బోనస్ అని సన్నాయి నొక్కులు నొక్కుతున్నారు అని దుయ్యబట్టారు.

అన్ని పంటలకు బోనస్ అని పెట్టి ఇప్పుడేమో సన్నాలకు మాత్రమే అంటున్నాడు. దొడ్డు వడ్లు పండించే వాళ్ళు ఎక్కువ. రూపాయికి 90 పైసలు దొడ్డువడ్లు పండిస్తే పది పైసలే సన్నాలు పండిస్తారు ఎన్నికల ముందు ఇంకెవరైనా రుణం తెచ్చుకోని వాళ్ళు ఉంటే జల్దీ రెండు లక్షల రుణం తెచ్చుకోండి. కాంగ్రెస్ ప్రభుత్వం వచ్చిన వెంటనే రెండు లక్షల రుణమాఫీ చేస్తామన్నారు అని అన్నారు.

9వ తారీకు చేస్తామన్నడు. రెండు రోజుల ముందే అధికారంలోకి వచ్చిన రేవంత్ రెడ్డి ఇప్పటివరకు రెండు లక్షల రుణమాఫీ చేయలేదు. రుణమాఫీ మొదటి సంతకంతోనే చేస్తా అని మాటతప్పిండు రేవంత్ రెడ్డి అని విమర్శించారు.

ప్రతి రైతుకు అన్నమాట ప్రకారంగా రుణమాఫీ చేస్తే, అవ్వ తాతలకు రూ. 4,000 పెన్షన్ ఇయ్యి అక్కచెల్లెళ్లకు రూ. 2,500 ఇయ్యి మీరు చెప్పిన ఆరు గ్యారెంటీల అమలు చేస్తే నేను రాజీనామా చేస్తా అని చెప్పిన.. నా ఎమ్మెల్యే పదవి కంటే రైతులకు రుణమాఫీ కావడమే నాకు ముఖ్యం. నా ఒక్కడి ఎమ్మెల్యే పదవి కంటే అవ్వ తాతలకు ₹4,000 పెన్షన్ రావడం నాకు ఆనందం. కాంగ్రెస్ చెప్పిన ఆరు గ్యారెంటీలు అమలు చేస్తే నా ఎమ్మెల్యే పదవి వదిలేస్తా అని సవాల్ చేసిన.. పంద్రాగస్టు వరకు రూ. 2 లక్షల రుణమాఫీ చేస్తామని చెప్పారు. మొదలు రూ. 49 వేల కోట్లు మాఫీ చేస్తామన్నారు. తర్వాత రూ. 31 వేల కోట్లు అన్నారు. చేసిందెంత అంటే రూ. 17 వేల కోట్లు అని అన్నారు.

నంగునూరులో 11,000 మంది రైతులు అప్పు తెచ్చుకుంటే రుణమాఫీ జరిగింది 5,000 మందికి మాత్రమే. రుణమాఫీ అయిన వాళ్ళు తక్కువ కానోళ్లు ఎక్కువ. హరీష్ రావు ఏడ నిద్రపోతున్నడు రాజీనామా ఎప్పుడు చేస్తావ్ అని అడుగుతున్నారు. నీ గుండెల్లో నిద్రపోతున్న రేవంత్ రెడ్డి. రైతులకు రుణమాఫీ జరిగేదాకా నిన్ను విడిచిపెట్టను. రేవంత్ రెడ్డిని గట్టిగా నిలదీస్తే సగం రుణమాఫీ జరిగింది అని తెలిపారు

హైదరాబాదులో కూర్చొని పెద్ద పెద్ద మాటలు మాట్లాడుడు కాదు. నువ్వు చెప్పిన ఏ ఒక్క హామీ రైతులకు నెరవేర్చలేదు. రేవంత్ రెడ్డిది అంతా మోసం అన్నీ అబద్ధాలే. ఆయన పేరు ఎనుముల రేవంత్ రెడ్డి, ఆయన పనులు చూస్తే ఎగవేతల రేవంత్ రెడ్డి.. ఎనుముల రేవంత్ రెడ్డి కాదు ఎగవేతల రేవంత్ రెడ్డి అని హరీష్ రావు ఫైర్ అయ్యారు.

రైతుబంధు ఎగపెట్టిండు, రూ. 4,000 పెన్షన్ ఎగపెట్టిండు, అక్కచెల్లెళ్లకు రూ. 2,500 ఎగపెట్టిండు, వడ్లకు బోనస్ ఎగపెట్టిండు, ఉద్యోగస్తులకు డిఏలు ఎగపెట్టిండు, తులం బంగారం ఎగపెట్టిండు. అందుకే నువ్వు ఎనుముల రేవంత్ రెడ్డి కాదు ఎగవేతల రేవంత్ రెడ్డివి.. ఇప్పటికైనా రైతులని, ప్రజలను మోసం చేయకుండా ఎన్నికల్లో ఇచ్చిన హామీలను నెరవేర్చమని నేను డిమాండ్ చేస్తున్నాను అని అన్నారు.

మీరిచ్చిన హామీలను నెరవేర్చేదాక బీఆర్ఎస్ పార్టీ విడిచిపెట్టదు.. దసరాలోపు రైతులందరికీ రుణమాఫీ చేయాలి. లేదంటే రైతులందరితో కలిసి సచివాలయం ముట్టడిస్తాం అని హెచ్చరించారు.