తమ మూడేళ్ల బాబుకు అరుదైన వ్యాధి కారణంగా వైద్యానికి డబ్బులు లేక ఆవేదనలో ఉన్న కుటుంబానికి ఎమ్మెల్సీ పోచంపల్లి శ్రీనివాస్ రెడ్డి అండగా నిలిచారు. బీఆర్ఎస్ వర్కింగ్ ప్రెసిడెంట్ కేటీఆర్ స్ఫూర్తితో ఆ కుటుంబానికి సాయం అందించాలని నిర్ణయించుకున్నారు.
హైదరాబాద్‌లోని నందినగర్ నివాసంలో సోమవారం కేటీఆర్ చేతుల మీదుగా ఆ కుటుంబానికి రూ. 5 లక్షల ఆర్థికసాయం అందించారు. జనగామ జిల్లా జాఫర్‌గఢ్ మండలం, తిమ్మంపేట్ గ్రామానికి చెందిన కుంబోజు మహేశ్వర్, అలేఖ్య దంపతులకు మాధవన్ అనే మూడేళ్ల బాబు ఉన్నాడు. ఆ బాబుకు గౌచర్ అనే అరుదైన వ్యాధి ఉండటంతో వైద్యానికి భారీగా డబ్బులు ఖర్చు పెట్టాల్సిన పరిస్థితి ఏర్పడింది.
మధ్యతరగతి కుటుంబం కావటంతో వైద్యానికి సాయం అందించాలని ఆ కుటుంబం దాతలను కోరింది. ఆ కుటుంబ పరిస్థితిని ఈనాడు పేపర్ లో వచ్చిన కథనం ద్వారా తెలుసుకున్న ఎమ్మెల్సీ పోచంపల్లి శ్రీనివాస్ రెడ్డి సాయం చేసేందుకు ముందుకు వచ్చారు.
కేటీఆర్ చేతుల మీదుగా మాజీ మంత్రి రాజయ్య ఆధ్వర్యంలో ఆ కుటుంబానికి రూ. 5 లక్షల చెక్కును అందజేశారు. కుటుంబానికి అండగా నిలిచిన ఎమ్మెల్సీ పోచంపల్లిని ఈ సందర్భంగా కేటీఆర్ అభినందించారు. తమ బాబు వైద్యానికి సాయం అందించిన పోచంపల్లికి బాబు తల్లితండ్రులు కృతజ్ఞతలు తెలిపారు