బుచ్చమ్మది ఆత్మహత్య కాదు.. రేవంత్ రెడ్డి ప్రభుత్వం చేసిన హత్య అని మాజీ మంత్రి హరీష్ రావు దుయ్యబట్టారు. హైడ్రా పేరిట ఇప్పటికే మూడు ఆత్మహత్యలు జరిగాయి.. కూల్చివేతలు కాదు నిలబెట్టడం నేర్చుకోవాలి అని రేవంత్ రెడ్డికి హితవు పలికారు.
హైడ్రా వేధింపులతో ఆత్మహత్య చేసుకున్న బుచ్చమ్మ మృతదేహాన్ని చూసేందుకు మాజీ మంత్రులు హరీష్ రావు, సబితా ఇంద్రారెడ్డి, కూకట్‌పల్లి ఎమ్మెల్యే కృష్ణారావు గాంధీ ఆసుపత్రికి వెళ్ళారు.
ఈ సందర్భంగా హరీష్ రావు మాట్లాడుతూ.. కూకట్‌పల్లి నియోజకవర్గం నల్లచెరువు బఫర్ జోన్‌లో ఉన్నటువంటి బుచ్చమ్మ హైడ్రా అధికారుల వేధింపులు భరించలేక, ఇల్లు ఎప్పుడు కూలగోడతారో తెలువక ఆందోళనతో ఆత్మహత్య చేసుకోవడం జరిగింది. హైడ్రా పేరిట ఇప్పటికే మూడు ఆత్మహత్యలు జరిగాయి అన్నారు.
రేవంత్ రెడ్డి గారిని నేను అడుగుతున్నాను.. ఇంకా ఎంతమందిని చంపదలుచుకున్నారు. బుచ్చమ్మ గారిది ఆత్మహత్య కాదు రేవంత్ రెడ్డి ప్రభుత్వం చేసిన హత్య. ఇది కేవలం రేవంత్ రెడ్డి చర్యల వల్ల జరిగిన హత్య అని విమర్శించారు.
రాష్ట్రంలో ఎన్ని సమస్యలు ఉన్నాయి. గాంధీ హాస్పిటల్‌లో చిన్న చిన్న మందులు లేక పారాసెటిమాల్ లాంటి గోలీలు కూడా ప్రైవేట్ మెడికల్ షాపుల్లో కొనుక్కునే పరిస్థితి ఏర్పడింది. గవర్నమెంట్ హాస్టళ్లలో, స్కూళ్లలో పురుగుల అన్నం పెట్టి వేధిస్తున్నారు. హైదరాబాద్‌ని నిలబెట్టే పని చెయ్యి.. కూల్చివేతలు కాదు నిలబెట్టడం నేర్చుకో అని అన్నారు.
హైదరాబాద్ జీహెచ్ఎంసీ పరిధిలోని ఎమ్మెల్యేలతో సమావేశం ఏర్పాటు చేసి కార్యాచరణ ప్రకటిస్తాం. గత కాంగ్రెస్, తెలుగుదేశం ప్రభుత్వ ఆదాయంలో నిర్మాణాలకు పర్మిషన్లు ఇచ్చారు. 30 ఏళ్ల నుండి నివాసాలు ఏర్పరచుకున్న వారిని కూల్చే అధికారం రేవంత్ రెడ్డికి ఎవరు ఇచ్చారు అని అడిగారు.
2013 భూ సేకరణ చట్ట ప్రకారం పేదలను నిర్వాసితులను చేస్తే ఇంటికి నష్టపరిహారం ఇవ్వాలి కొత్త ఇల్లు నిర్మించి ఇవ్వాలి. జీవన భృతి కింద ఐదు లక్షల రూపాయలు ఇవ్వాలని కాంగ్రెస్ ప్రభుత్వం తెచ్చిన భూసేకరణ చట్టంలో స్పష్టంగా ఉంది. ప్రజలు ఉపాధి పోయి ఇల్లుపోయి రోడ్డు మీదకు వస్తున్నారు. నష్టపరిహారం ఇచ్చే విషయంలో కూడా ప్రభుత్వం దగ్గర ఎలాంటి సమాచారం లేదు అని మండిపడ్డారు.
నష్టపరిహారం, ఉపాధి కల్పించడం చేసిన తర్వాత వారిని ఒప్పించిన తర్వాతనే నిర్మాణాలను కూలగొట్టాలి. ముఖ్యమంత్రిగా ప్రజలకు సహాయం చేస్తావా? లేక పేదలకు కన్నీళ్లు పెట్టిస్తావా? ఇప్పటికైనా పిచ్చి పనులు మార్చుకో రేవంత్ రెడ్డి. వెంటనే ఆఖిలపక్ష సమావేశం ఏర్పాటు చేయాలి. అఖిలపక్ష సమావేశంలో అన్ని పార్టీల నిర్ణయాలతో ముందుకు వెళ్లాలి అని హరీష్ రావు డిమాండ్ చేశారు.
బాధితులు ఆందోళన చెందవద్దు మీకు అండగా బీఆర్ఎస్ పార్టీ ఉంది. ఎవరూ ఆత్మహత్యలు చేసుకోవద్దని, ధైర్యంగా ఉండాలని కోరుకుంటున్నాను. జీవించి పోరాడాలి.. పోరాడి సాధించాలి. ఉన్నదాంట్లో అందరికి మంచి చేయాలి. పేదల కన్నీళ్లు మనకు వద్దు అని పిలుపునిచ్చారు.
ఎవరికోసం ఈ మూసీ సుందరీకరణ? ఎవరికి మేలు చేసేందుకు ఈ కూల్చివేతలు.. హైడ్రా మీద పోలీస్ కేసు నమోదు చేయాలి. రంగనాథ్ పేదవాళ్ల ఇళ్లను రాత్రికి రాత్రి కూల్చివేస్తున్నారు. రేవంత్ రెడ్డి సోదరునికి నెల రోజుల ముందు పర్మిషన్ తెచ్చుకునే అవకాశం కల్పించారు. పేదవారి ఇండ్లను ఎందుకు నోటీసులు ఇవ్వకుండా కూల్చివేస్తున్నారు. పేదవారికి ఒక న్యాయం రేవంత్ రెడ్డి సోదరులకు ఒక న్యాయమా అని ప్రశ్నించారు.
పేదలు కోర్టుకి వెళ్లలేరు అనే ధైర్యంతోనే కదా వారి ఇళ్లను కూల్చి వేస్తున్నారు. రేవంత్ రెడ్డి సోదరులు లాగానే అందరికి నోటీసులు ఇవ్వాలి. రేవంత్ రెడ్డి ఇలాంటి చర్యలు మానుకోవాలి అని సూచించారు.